الجسم الغريب داخل العين
خليونا أولا نعرفو شنو هو هاد الجسم الغريب لي يمكن ليه يدخل في العين، من بين الأشياء لي يمكن ليها تدخل للعين بطريقة مفاجئة وغير مقصودة :
- حبة رمل
- رموش
- غبار
- شظية ديال الزجاج
- خشب أو معدن
- شوك،نبات ...الخ
شنو كي ترتب عن دخول جسم غريب داخل العين ؟
- درجة الخطورة كتفاوت على حسب طبيعة ونوع الجسم الصلب لي دخل في العين وكذلك على حسب المكان لي دخل فيها ، داكشي علاش كي كون عندنا نوعين من الحالات.
- الأجسام الصلبة السطحية
- الأجسام الصلبة العميقة
شنو هي الأعراض عند دخول جسم غريب داخل العين ؟
بمجرد دخول جسم غريب في العين، كي ترتب عليه ألم مفاجئ لي كي كون شديد، وكردة فعل طبيعية، العين كتبدا تحمار وكي سيل منها الدموع وقد تكون هاد العملية كافية باش يخرج منها داك الجسم الغريب لي دخل عليها.
بالإضافة لهاد الأعراض، يمكن لك تحس بالرغبة في الحكة، وفي هاد المسألة خاصك تنتابه مزيان حيت ما خاصكش تحك عينك
حيت غادي تقدر تزيد تخلي داك الجسم الغريب يزيد يتعمق داخل العين بسبب حركة حك العين وكذلك كتولي العين عرضة لدخول الميكروبات لي كتكون في إيدينا.
الأجسام الصلبة السطحية
الأجسام الصلبة لي كتبقا باينة على سطح العين كتكون غالبا عندها أضرار بسيطة مثلا : حبة الرمل،الغبرة أو الرموش وهي كتكون باينة بين سطح العين و الجفن.
الأجسام الصلبة العميقة
كتكون ناتجة عن دخول جسم صلب بقوة وبسرعة، لي كي خليها تستقر و تغرس داخل العين بشكل أعمق وغالبا كتكون شي قطعة ديال معدن أو شظية ديال الزجاج وبالتالي يمكن ليها تتسبب في أضرار بالغة للعين وتعفنات ميكروبية في حالة ما تحيداتش.
شنو ندير في حالة دخول جسم غريب داخل العين ؟
ردود الأفعال كتختالف على حسب الحالة لي وقعت لينا
الحالات المستعجلة :
وهي الحالات لي كطَلّب تدخل طبي أي أنه لازم علك تمشي عند طبيب العيون في حالة ما دخل لك شي جسم صلب داخل العين بطريقة عنيفة ( قطعة زجاجية أو حديدة مثلا) حيت غالبا غادي تكون داخلة في عمق العين، أو في حالة الإحساس بألم قوي في العين، ضبابية الرؤية، وجود جرح في العين، ونحاول نغطي عيني بشي ضماضة او شي قطعة قماش بلا منضغط عليها بقوة.
في كل الحالات :في أي حال من الأحوال، ما خصكش تحك عينك بأي شكل من الأشكال حيت هاد العملية غادي تزيد تخلي داك الجسم الغريب يزيد يتعمق في العين.
الحالات السطحية
في حالة ما كان دخول جسم غريب داخل العين بشكل سطحي، فهاد الحالة ممكن أننا نحيدوه بكل سهولة، ما عليك سوى إتباع الطرق التالية :
- غسل اليدين جيدا بالصابون
- فتح وغلق العين بسرعة أي أنني نبقا نرمش باش نخلي الدموع يدفع هداك الجسم لي لاصق على سطح العين
- كنغطس عيني فشي إناء ندير فيه الما، ويستحسن يكون ماء مفلتر او ماء معدني، اما الا كان الطفل هو لي مصاب يستحسن اننا نميلو ليه راسو على جنب ونفتحو ليه عينو مزيان نبداو نكبو عليها لما من الجنب للجنب لاخر.
- وكتبقا أفضل طريقة هي إستعمال المحلول الملحي لي لازم يكون متوفر في كل بيت لغسل العين.
إنتباه ! لابد أننا نتجنبو نديرو بعض الأشياء لي يمكن تعطينا نتيجة عكسية
من بين الاشياء لي لازمنا ننتابهو ليها هي أنه ما خاصناش نستعملو شي أداة صلبة بحال عيدان ديال السنان او الملقاط أو شي فوطة باش نحيدو داك الجسم الغريب لي لاصق على سطح العين.
كان هدا شرح مبسط لكيفية معرفة طريقة التعامل مع حالة دخول جسم غريب داخل العين، كنتمنى تكون تسافدتي من هاد الموضوع، ما تبخلش علينا بمشاركتك عبر وسائل التواصل الإجتماعي.
جزاك الله كل خير اخي على المعلومات الواضحة والشاملة و المفيدة جدا، نفعك الله بعلمك بما تقدمه من توعية و منفعة لناس
ردحذفسعدنا بتعليقكم الجميل، نتمنى ان نكون دائما في حسن الظن
حذف