هاد الموضوع بالنسبة للناس لي بغاو يفتحو حساب على موقع فيسبوك لأول مرة، المسألة ساهلة بزاف، غادي تحتاج ضروري في الأول أنه يكون عندك بريد إلكتروني (E-mail)، لأنه بيه غادي تفعل الحساب الجديد ديالك Facebook. في حالة إلى معندكش إميل، ممكن أنك تصاوب إميل جديد من "هنا".
الخطوة الأولى:
بعد ما صاوبتي إميل يمكن لك دابا تفتح حساب جديد فيسبوك من"هنا "، حاول تبع المراحل لي غادي نشرح ليك من بعد.
الخطوة الثانية:
دخل الإسم الشخصي والعائلي، الإميل كتبو جوج مرات، كلمة السر، تاريخ الإزدياد، ذكر أو أنثى و في أخير كليكي على البوطونا الخضرا " إنشاء حساب في الفيسبوك"
الخطوة الثالثة:
بعد ما كليكيتي على "فتح حساب جديد" غادي تبان لك صفحة جديدة فيها 3 ديال الخطوات، في الخطوة الأولى غادي طلب منك واش يخبر الأصدقاء ديالك لي عندك في الإميل ديالك بأنك تسجلتي في حساب جديد للفيسبوك، من الأحسن أنك تجاهل هاد العملية وتكليكي على "تخطي هذه الخطوة" كما هو موضح في الصورة.
الخطوة الرابعة:
في هاد الخطوة غادي طلب منك دّخل المعلومات الخاصة بيك، خليهم خاوين وكليكي على "تخطي".
الخطوة الخامسة:
في هاد المرحلة هي لي كدير فيها الصورة ديالك، بالضغط على " إضافة صورة "، في حالة مبغيتيش تزيد شي صورة كليكي على "تخطي".
الخطوة السادسة والأخيرة:
في هاد المرحلة خاصك تمشي تفتح الإميل ديالك، عادي تلقى وصلاتك رسالة من فيسبوك، فتحها وكليكي علي واحد الرابط باش تفعل الحساب ديالك .
مبروك عليك حساب فيسبوك
