من بين أسؤ المواقف لي يمكن أنك طيح فيها، هي تكون سايق بسرعة وتبغي تنقص السرعة، ساعتها مالقيتي ما تفراني!!!، الفران ما بقاش خدام !! في هاد الحالة غادي ترتابك وما غديش تعرف تصرف أولا شنو دير، بالخصوص إلى كنتي غادي بسرعة أولا بالليل. في حالة إلى ما كانش تصرف ديالك صحيح في هاد المشكلة، غادي تعرض نفسك والناس لي راكبين معاك للخطر، وهذا هو الهدف من هاد الموضوع لي غادي تقرا ليوما، باش تعرف شنو دير في حالة تقطع بيك الفران.
الخطوة الأولى : حاول تبقى هادئ، وبلا ما توتر !
أي توتر أو خوف ما غاديش يكون في صالحك، ويقدر أن الأمر يزداد خطورة في حالة إلى بالغتي في ردة الفعل ديالك أولا ما تحكمتيش في أعصابك، بحال هاد المشاكل كتكون مفاجئة أو ما كيكونش لواحد مهيئ راسو باش يتصرف كما يجب خصوصا أنه معندكش الوقت الكافي باش تفكر شنو خاصك الدير في هاد الحالة!
الخطوة الثانية : فكر قبل ما تستعمل فرانأمان :frein à main !!!
ربما أول حاجة غادي تفكر فيها هي أنك تستعمل فرانأمان frein à main ، لكن هاد الحل ما غاديش ينفعك في حالة إلى كنتي غادي بسرعة كبيرة، تكون غادي في الطريق السيار مثلا، إلى جريتي الفرانأمان غادي تفراني الروايض لي كينين اللور، وبالتالي مع سرعة الطوموبيل غادي الدور و إحتمال كبير تقلب !!!
أما إلا كانت السرعة صغيرة فممكن أنك تستعمل فرانأمان، ولكن ماشي تجبد بجهد خاصك طلع شوية وترضو بلاستو تحت وفي نفس الوقت خاصك تكون متحكم مزيان في الفولا (Volant)، باش متهربش بيك، وهاكدا بشوية بشوية غادي تبقى تعاود ديك العملية حتي توقف.
الخطوة الثالثة : ما تسكتش الموطور !!
في حالة فكرتي تسكت الموطور، فإعلم بأن حياتك في خطر!!!، حيت ديك الساعة الفولا (volant) كتبلوكة أو ما غاديش تقدر تبدل إتجاه الطوموبيل في حالة بغيتي تفادى الإصضدام مع شي طوموبيل خرى قدامك، لذلك ممنوع أنك تسكت الموطور في هاد الحالة.
الخطوة الرابعة : دير پامور point mort
في حالة إلى كان كسيراتور مبلوكي، تأكد مزيان واش كينا شي حاجا لي حابساه،(قرعة ديال لما مثلا...)، هي لابد أنك تحاول تحيدها بسرعة أو من الأحسن يحيدها شي حد راكب حداك باش تبقى منتابه في الطريق، أما إلى كان البلوكاج سبابو شي حاجة خرى مابيناش في هاد الحالة الخطوة الوحيدة ليمكن ليها تساعدك وتخلي السرعة تنقص، هي أنك دير پامور point mort، أو تبقى تفراني بشوية بشوية حتى توقف، لأن في هاد الحالة الفران مافيهش مشكل.
علاش غادي نديرو پامور ؟ مني كتكون داير پامور، ديك الساعة الموطور ماكيبقاش كيدَوَّر الروايد، بحال مني يلاه كديماري الطوموبيل أو كتكون واقفة ديك الساعة الموطور كي دُور، ولكن الروايض واقفين, وفي هاد الحالة غادي تفصل الموطور على الروايض ودير الساعة الموطور ماغاديش يبقى يزيد في سرعة ديال الطوموبيل.
الحالة الخامسة : ڭراطي الفيتاس بالعكس Rétrograder !!
خاصك تعرف بأن الطوموبيل فيها 3 أنواع ديل الفران :
- فران ديال رجل La pédal de frein
- فران أمان Frein à main
- فران موطور Frein Moteur
فران موطور كنستعملوه غالبا في المنحدرات، أي أنه هو لي كي نقص لينا السرعة مني كنكونو هابطين فشي هبطة، كدير الفيتاس في دوزيام وكتحس بأن الطوموبيل تقالت ونقصات من السرعة ديالها في المنحدر، لذلك باش نقصو من السرعة في حالة وقع شي عطب في الفران العادي، كنبداو نكراطيو بالعكس، من 4eme إلى 3eme ثم من 3eme إلى 2eme ثم من 2eme إلى بروميار, هكدا غادي تخلي لموطور ينقص من سرعة الطموبيل بإستعمال فران موطور.
رائع ✌ لك مني أجمل تحية
ردحذفبارك الله فيكم
ردحذفأحسنت
ردحذف