تيليفون طفا ومبغاش إشعل، شنو ندير ؟

 تيليفون طفا ومبغاش إشعل، شنو ندير؟

ليوم غادي نحاولو نتعرفو على بعض الأساليب لي يمكن لينا نديروها في حالة إلا طفا التيليفون أو مبغاش يشعل،خاصك تعرف بأن هاد المشكل ما عندوش سبب واحد، كينين بزاف ديال الأسباب لي يمكن ليها متخليش تيليفون يشعل هادشي علاش غادي نحاولو نتعرفو على بعض الأساليب لي ممكن أنها تنجح في مثل هاد الحالات :

1. مشكلة البطارية (la batterie) : 

كين إحتمال كبير أن البارتري تكون هي المشكل في بعض هاد الحالات، أول حاجة لي يمكن لك دير هو تخلي تيليفون في شارج مدة ربع ساعة على الأقل، من بعد منها حاول تشعلو، إلى مشعلش،خاصك فهاد الحالة تأكد واش المشكلة في لباتري ولا المشكلة في تيليفون، وباش تأكد 100% بأن المشكلة في الباتري حاول تستعمل باتري خرى من نفس نوع التيليفون باش تجرب. وباش تأكد بأن الباتري ديالك ماتت، حاول تركبها في تيليفون أخر من نفس النوع وديرو يتشارجا لمدة ربع ساعة على الأقل وشوف واش هاداك تيليفون لاخر واش غادي شعل أولا لا

بقاو عندنا جوج إحتمالات:  الإحتمال الأول تكون الباتري ماتت، في هاد الحالة التيليفون لاخر لي ركبتي في الباتري ديالك وشارجيتيه حتى هو ماغاديش يشعل، الإحتمال التاني يكون تيليفون لي فيه المشكل، وبالضبط كي كون المشكل في دوك ريوس لي كي دوزو ضو من تيليفون الباتري (هوما هادوك نويفات ديال نحاس لي كي شارجيو الباتري)، حاول تعاود تركب الباتري ودير شي طرف ديال كاغط مابين الباتري أو الحاشية لي كتركب فيها الباتري باش تدفعها وتقيس مزيان دوك النويفات باش ما يبقاش mauvais contact,حتى هادوك مربعات صفرين ديال نحاس لي كينين في باتري، حاول تحكهم بشي طورنوفيس رقيق، حيت كين إحتمال تكون مغطياهم طبقة عازلة وما تخليش التيليفون يشعل (1) 

                                           (1)

2. مشكلة في تيليفون .

هناك إحتمالات أخرى يمكن تكون السبب لي خلات التيليفون ما يشعلش ما عليك غير تبع هاد المراحل، ويلا مانجحاتش لك شي وحدة، جرب المرحلة لي موراها، حتى يجيب الله التيسير :) :

الطريقة الأولى :

حاول تكونيكتي التيليفون مع PC بالكابل أوريجينال، خليه لمدة 10 دقايق، إلى بدا كي تشارجا حاول تبقى مورك على البوطونة منين كي شعل تيليفون لمدة 20 ثانية تقريبا، في حالة إلى شعل خليه مكونيكتي مع بيسي شي نص ساعة على الأقل ومن بعد ديرو يتشارجا بالشارجور ديال الضو.(دوز لطريقة الثانية إلى منجحاتش )

الطريقة الثانية :

حَيَّد الباتري أو برونشي الشارجور مع التيليفون (بلا باتري) وبقا مورك على البوتونا ديال الشعيل مدة 30 ثانية، من بعد، حيد الشارجور و ركب الباتري و عاود رض الشارجور مرة خرى و عاود ورك على البطونة باش يشعل.

الطريقة الثالتة : 

حيَّد الباتري مدة 2 دقايق تقريبا ورَدْها ، من بعد، برونشي الشارجور وخليه لمدة 15 دقيقة، بقا مورك على البطونة باش تشعلو لمدة 15 ثانية حتى يشعل.

في حالة إلا منجحاتش أي طريقة من هاد الطرق لي شفناها كلها، ماعليك غير ديه لشي معلم باش يصايبو لك.