بغيت نتعلم اللغة الفرنسية، شنو ندير ؟

بغيت نتعلم اللغة الفرنسية، شنو ندير ؟

هاد الموضوع بي النسبة للناس لي عندهم شويا لاباز في الفرونسي وإكي فهمو شي واحد بنسبة 80% إلى هضر معاهم بالفرنسية وعندهم مشكل هو ما كي قدروش يهضرو ويخرجو الكلام, والهدف من هاد الموضوع، أنني نزيد نوضح لك بعض الأساليب لي خاصك دير وبعض الحوايج لي خاصك تخلى عليها باش تتكلم بطلاقة بإذن الله.

واش بغيتي تعلم تهضر بالفرنسية ؟ 

خليونا نتافقو في الأول على شنو المعنى أنك "تهضر بالفرنسية "، بالنسبة ليا أنك تكون قادر تواصل بكل بساطة مع شخص فرنسي أو شخص كي تقن الفرنسية،خاصك تفهم كل ما كي قول وتكون بدورك قادر أنك تهضر معاه بكل سهولة وبدون مجهود.
المسألة المهمة ولي كي وقعو فيها بزاف ديال الناس مني كي بغيو يهضرو بالفرنسية، هي أنه قبل ما كي تكلم كي ترجم في دماغو بالعربية، عاد كي بغي هضر، وهاذا خطأ كبيير وخاصنا نتفاداوه لأن سياق اللغة الفرنسية ماشي بحال العربية.

علاش بغيتي تهضر بالفرنسية :

باش نجاوبو على هاد السؤال، لازم يكون عندنا هدف واضح على أساسو أنك غادي تصبر وتعطي لراسك الخاطر باش تعلم تهضر بالفرنسية، وهاد الهدف هو لي غادي يحفزك باش تنجح، كون متأكد بأنك بدون هدف يعني ماكينش تحفيز يعني ماغاديش تكّمل.

هادشي علاش خاصك تسول راسك سؤال ويكون الجواب مقنع بالنسبة لك والسؤال هو : شنو هو الهدف أولا الأهداف لي تخليك تعلم باش تهضر بالفرنسية ؟

1. واش الهدف هو أنك تكلم مع شخص أجنبي ؟
2. واش الهدف أنك تستعمل اللغة الفرنسية في الخدمة ديالك ؟
3. واش الهدف أنك تفرج في أفلام أولا تقرا كتوبة ؟
4. واش الهدف أنك بغيتي تمشي تكمل قرايك في فرانسا؟
5.أولا شي هدف أخر من غير هادو لي شفنا ؟

بعد ما جاوبتي على هاد السؤال بكل ثقة، غادي ساعدك أولا باش تْحَفّز وتكون عندك قناعة بالهدف ديالك،  في الفقرة لي جاية غادي نوريك شنو هوما الأسالب لي خاصك تبع باش تنجح في هاد المهمة بإذن الله.

كيفاش نتعلم نتكلم باللغة الفرنسية : 

باش نتعلمو أي لغة لازم تتوفر عندنا 6 ديال شروط :

1. مُحَفِزْ
2. الثقة بالنفس
3.الطريقة السليمة
4. تنظيم مُحكم
5. الوسائل أو الأجهزة الضرورية
6. خلق علاقات مع أشخاص أجانب

1.المحفز: هي المسألة لي هضرنا فيها في الأول، وهي أنك خاصك تحدد الهدف لي غادي خليك دائما محفز باش تكمل.

2. الثقة بالنفس : باش تعلم خاصك ضروري تيق فراسك وما تفكرش في أي حاجة غادي تخليك تخلى على الهدف ديالك، داكشي علاش ماخاصكش تحڭر راسك وتقول دائما في نفسك ،غادي نجح إنشاء الله".

3.الطريقة السليمة : هادي هي أهم مرحلة في التعلم، لازم تبع الطريقة السليمة ، إلا سولتك سؤال بسيط، كيفاش تعلمتي تهضر بالدارجة المغربية؟ واش تعلمتيها في المدرسة، واش إلا كان شي نصراني ماقاريش (واخا هاد القضية مستحيلة ) واش ماغاديش يعرف يهضر بالفرنسية؟ بطبيعة الحال غادي يهضر بيها بكل طلاقة واخا عمرو مشا المدراسة، ولكن كيفاش ؟؟ خاصنا نعرفو أننا باش نتعلمو نهضرو بشي لغة كيفما كانت خاصنا نمرو بعدة مراحل، وهاد المراحل هي لي كنعيشوها مني يلا كنتزادو حتى كنْوليِوْ نهضرو، أي من 0 إلى 4 سنين تقريبا،
. في العام الأول الرضيع كي كون غير كي سمع ولكن ماكيفهمش وما كيهضرش.
. في العام التاني كي ولي يفهم شوية ولكن باقي ماكيهضرش
.في العام التالث كي ولي يفهم شوية وكي هضر غير شوية
. وفي العام الرابع أو لخامس كي ولي كي فهم وكي هضر
هاد المراحل هي لي مرو منها أطفال العالم كامل وبأي لغة كانت، إذن شنو كنستافدو من هاد المعلومات، هو أن أفضل وسيلة لتعلم اللغة هي السمع، وتكرار الكلام, وهادي هي الطريقة السحرية لخاصك تبعها باش تعلم تهضر بالفرنسية.

 4. تنظيم مُحكم : لازم يكون عندك برنامج يومي تكون محدد فيه شنو غادي تقرا وشنو غادي تسمع يوميا بصفة منتظمة.

5. الوسائل أو الأجهزة الضرورية  :  مادام غادي نستعملو حاسة السمع في طريقة التعلم، لازم يكونو عندنا بعض الوسائل لي كتسهل علينا هاد العملية، مثل (Lecteur MP3 ، أولا تليفون ). خاصنا نبقاو نسمعو لقصص، برامج، لمرات متكررة وبلا من حسو بالملل، لأن عملية التكرار هي الأهم،خاصك تسمع لشي قصة وتحفض بعض المفردات (Vocabulaires) لي فيها وتحاول تسمع قصة وحدة خرى فيها ديك المفردات لكن السياق مختالف، وفي هاد الحالة غادي تعقل عليها مزيان.

6. خلق علاقات مع أشخاص أجانب : حاول تخلق علاقات سواء مع أشخاص أجانب أولا مغاربة كي تقنو الفرنسية وحاول تهضرو مع بعضياتكم، وخا عادي تجيك صعيبة شويا في الأول، لكن غير حاول تكمل.

بقات أهم مسألة وهي مربط الفرس، شنو هوما لحوايج لي غادي نسمعو ليها ولا نقراوها بصفة متكررة، المفاجأة هي أنني غادي نهديك"Pack 1 et pack 2 Français authentique المشهور والمعروف مجانا :) لي كي قدر التمن ديالهم 1500 درهم .ما عليك غير تبارطاجي معا صحابك هاد المقال على الفيسبوك ودير j'aime للصفحة فيسبوك للدعم فقط بالضغط على الزر ديال فيسبوك لي تحت، وخلي إميل ديالك في تعليق وأنا بدوري غادي نسيفط ليك رابط التحميل، بالتوفيق للجميع.