في حالة ما تْعَرضْ ليا شي كلب، شنو ندير ؟

ماكينش لي فينا لي معمرو تعرض ليه شي كلب في طريق وغالبا فديك الساعة مكتعرفش شنو دير في هاد الحالة، حيث كي كون الأمر مفاجئ ومكتكونش مستاعد تعامل مع بحال هاد المواقف ولي يمكن يترتب عليها عواقب وخيمة في حالة ما عرفناش كيفاش نخرجو راسنا من هاد الموقف الصعيب، اليوم غادي نشارك معاكم بعض النصائح المهمة لي لازم يكون عارفها أي واحد فينا لربما يطيح في نفس الموقف شي نهار ويعرف كيفاش يخرج راسو من هاد الوحلة !!!

أول حاجة : حاول متخلعش وحافض على الهدوء ديالك !

مسألة الخوف طبيعية عند الإنسان، لكن هذا ما يعنيش أنني نوصل لحالة ذعر كبيرة في حالة ما تعرض ليا شي كلب في الطريق، المسألة ماشي ساهلة، ولكن لازم علك أنك تْبت شوية وميبانش علك أنك خايف بزاف، خصوصا أن الكلب عندو القدرة على أنه يستشعر الخوف ديالك بسهولة وهادشي كي خلي غريزة الهجوم عندو كتفعل وبالتالي غادي استغل ديك نقطة الضعف ومن تم غادي هجم علك. 

ثانيا : ماتحاولش تهرب !

عمرك ما تفكر أن الهروب هو أحسن حل في حالة ما تعرض ليك شي كلب في الطريق، وبالتالي غادي تْعَرض راسك للخطر لأنك مستحيل تكون سرعة ديالك كتر من الكلب، سوى الى كانت سميتك "هشام الڭروج" ☺. زيادة على ذلك هو أنه لما يشوفك هربتي كي تبعك تلقائيا وهذا راجع لغريزة الكلب لي كتخليه يتبع أي حاجة في حالة هروب. ولا كنتي مسبقا كتجري في حالة ما كنتي كتمارس الرياضة، لازم ما تنقص من السرعة ديالك تدريجيا حتي توقف. 

ثلتا: ماتشوفش ليه مباشرة في عينيه !  

لازم تعرف أن الشوف مباشرة في العين ديال الكلب كتخليه يحس بالتهديد وكتزيد في نسبة العدوانية ديالو وبالتالي كتكون ردة الفعل ديالو عدوانية أكثر باش يدافع على راسو، لكن هذا ماكيعنيش أنك متشوفش فيه بمرة !!! ، لكن حاول تحضي معاه غير بطرف العين، وحاول ماتحركش من بلاصتك وبقا تابت ومن الأفضل أنك متوقفش فاص، حاول تخليه في الجنب الديالك بحال إلى ممصوقش ليه، وخا تسمعو كي نبح بزاف بقا مهدن ودير بحال ماكين والو، ديك الساعة ماغديش يحس بأن هناك خطر ويقدر يبدا يتهدن، فديك الساعة حاول تتمشي بشوية في الإتجاه المعاكس حتي تفك منو بسهولة  !

رابعا : حاول تجمع إيديك وصباعك !

من الطبيعة الغريزية للكلاب أنه أي حاجة كتحرك كتير الإنتباه ديالهم وبالتالي لازم عليك تخلي يديك مجموعين فجنبك أو أنك تخشيهم في الجيب الديالك، وبلا متحاول تستعمل إديك باش تجري عليه، لأنه من المحتمل يعضك !

خامسا : حاول تشتت الإنتباه ديالو ! 

كيف ما دكرنا سابقا أن من طبيعة ديال الكلب أنه كيتفاعل مع الأشياء، في هاد الحالة إلى كنتي هاز في يديك شي حاجة ممكن تعتق الموقف مثلا : قرعة ديال الما،صاك أو أي حاجة ممكن تستعملها باش تشتت الإنتباه ديالو، كتحاول تلوحها ليه في الإتجاه المعاكس ديالو ومن الممكن أنه يتبعها ويخلي لك الفرصة فاش تسلت فحالك !