الشراء عبر الأنترنت أصبح من الأشياء الضرورية في حياتنا اليومية، وهذا راجع لعدة عوامل إيجابية، سرعة عملية الشراء، إختيارات متعددة، الإستفادة من عروض التخفيض، يمكن لك تشري من أي دولة في العالم ....
العديد من الناس كي خافو يشريو من الأنترنت حيت كي خافو يتعرضو لعملية نصب، وهاد المسألة بطبيعة الحال ممكن توقع في حالة إلي شريتي من شي موقع غير موثوق لهاذا فهاد الموضوع غادي نشوفو شنو خاص إيكون عندنا باش يمكن لينا نشريو من الأنترنت و شنو هوما المواقع الموثوقة "ولي مجربها أنا شخصيا " لي يمكن لينا نشريو منها .
شنو خاص يكون عندك باش تشري من الأنترنت ؟
الحالة الأولى : الشراء من المواقع المحلية
المواقع المحلية، هي المواقع لي تتواجد في المغرب بحال مثلا موقع jumia.ma , microchoix.ma ... بحال هاد المواقع كتكون فيها عملية الشراء جد سهلة، حيت يمكن لك تشري من أي موقع أي منتوج بلا متكون عندك لا بطاقة فيزا لا والو، وهاد العملية كتسمى "الأداء عند التسليم"paiement à la livraison", يعني أنك بعد ما كطلب المنتوج من أحد المواقع المحلية كيف ما شفنا قبل، ما كتخلص السلعة حتي كيجيبوها لك لدار. وهادي هي أفضل ميزة كنصحكم ديروها دائما في عملية الشراء، دائما نختار في عملية الطلب "paiement en espèces à la livraison ".
الحالة الثانية: الشراء من مواقع أجنبية
في هاد الحالة لازم تنتابه لعدة مسائل لازم تعرفها، أولها لازم تكون عندك بطاقة خاصة للشراء من الأنترنت، وهاد النوع من البطاقات كتوفرها تقريبا جميع الأبناك الحالية لي لازم تمشي البنكة ديالك وكدير طلب باش يخرجوها لك، ما كتكونش عليها شي مصاريف كتيرة لكن خاصك تعرف بأن كل عملية شراء, البنك كي ياخد نسبة %2 تقريبا عن كل عملية شراء من الثمن لي خلصتي على المنتوج، يعني إلي شريتي منتوج ساوي 100 درهم، البنك كي ياخد 2 دراهم, وغالبا هاد النوع من البطاقات ماكيفوتوش لك 10.000 درهم في العام لي يمكن لك تشري بيها .
بطاقات الشراء من الانترنت بالمغرب
1. بطاقة My e-c@rd : بنك الشركة العامة (Société Général)
2. بطاقة e-pay : بنك المغربي للتجارة الخارجية (BMCE)
3. بطاقة I-c@rd : بنك الشعبي (Banque Populaire)
4. بطاقة Web p@y : بنك التجاري وفا بنك (Attijariwafa bank)
5. بطاقة e-Buy : بنك مصرف المغرب (crédit du maroc)
6. بطاقة Oxygen : شركة (SALAFIN) للقروض الاستهلاكية وهي شركة تابعة لبنك BMCE
7. بطاقة e-shopping : بنك القرض العقاري و السياحي (CIH)
شفنا تقريبا جميع أنواع البطاقات لي يمكن لك تطلبها من البنكة ديالك و حاول تعرف جميع المعلومات على البطاقة ملي تمشي عندهم، (كيفاش تشارجيها، واش يمكن لك تربطها بي بايبال Paypal ، شحال نسبة لي كي ياخدو من كل عملية شراء...), بعد ما عرفنا البطاقة لي لازمنا، وبعد ما تسلمناها دابا غادي نجيو لمرحلة شنو هوما المواقع الأجنبية الموثوقة لي يمكن ليا نشري منها بدول مشاكل، غا نوريك بعض المواقع لي جربتها شخصيا، ولي شريت منها عدة مرات.
1. موقع DealeXtreme
هاد الموقع من بين أفضل المواقع لي يمكن لك تشري منها، والجميل في هاد لموقع أن كلفة التسليم مجانية %100 يعني غادي تخلض ثمن ديالها بدون مصاريف الشحن، وغادي تجيك ورقة لعنوان ديالك، وتمشي تاخد السلعة لي طلبتي من البوسطة La poste, وخا تطلب بريكة ديال 10 دراهم إيجيبوها لك، لكن المشكلة في المدة باش توصلك لي غالبا كتكون من 30 حتى 40 يوم، لكن هاد الموقع كي وفر خدمة التسليم السريع لي كي كون أقل من أسبوع، لكن راك كتخلص عليه بطبيعة الحال و أغلب هاد السلعة كتجي من الصين, سبق ليا شريت منو، وصلتني السلعة في مدة 34 يوم.
2. Tinydeal.com
حتي هو موقع صيني ونفس فكرة موقع Dealextreme ، حتي هو كي توفر على خدمة الشحن والتسليم المجاني .
موقع Ebay
موقع amazon.com
بالنسبة لمواقع amazon و Ebay ماشي كلشي يمكن لك تشريه، لازم تشوف واش البائع ممكن أنه يرسل لك السلعة للمغرب وشحال مصاريف الشحن لأن هناك بعض السلع لِمايمكنش لك طلبها بسبب البلد، دائما خاصك تعرف بأن السلع لي يمكن ليها تجيك المغرب بالمجان هي لي فيها عبارة Free shipping ، ممكن كذلك تلقى سلعة أخرى كتفرض علك تخلص مصاريف الشحن بالنسبة للمغرب .
ملحوظة هامة : لازم تعرف بأن ما يمكنش لك تطلب أي سلعة بأي ثمن بغيتي، لازم تعرف بأنك إلى طلبتي شي سلعة غالية راه ضروري تخلص عليها الديوانة داكشي علاش خاصك ما تفوتش 500 درهم أو أنك ماخاصكش تطلب شي سلعة رخيصة بكمية كبيرة وخا تكون قل من 500 درهم تقدر تخلص عليها ديوانة لأنها غادي عتابروها للتجارة
شكرا بزاف بزاف على هاد المعلومات القيمة
ردحذف