إلى رعفت شنو ندير ؟

السلام عليكم ورحمة الله، الموضوع ليوم هو "الرعاف" عند الأطفال أو عند الكبار في السن، كيف ما كنعرفو جميع، أن الرعاف هو مني كيسيل الدم من الأنف وكيكون السبب غالبا مني كي طرطقو واحد العريقات رقاق بزاف كي كونو في الأنف نتيجة إرتفاع صغط الدم،ممارسة الرياضة أو إرتفاع درجة الحرارة في فصل الصيف مثلا.

غالبا ما كي كون العلاج من الرعاف بسيط وماكستدعيش أننا نخافو منو، لكن هذا ما يعنيش أنه كين  هناك بعض الحالات لي كي كون إحتمال على وجود شي مرض,  و أن الرعاف كان عبارة على إنذار لينا باش نمشيو عند الطبيب لعمل الفحصات اللازمة.

شنو ندير إلى رعفت ؟ أول حاجة نحاول أنني نتفادى نهز راسي لفوق باش يرجع الدم، لأن هاد الطريقة غالطة وما عندها حتى نتيجة، بالعكس حيت هداك الدم غادي رجع ويهبط لينا مع مجرى التنفس، وفهاد الحالة ماغديش نكونو حلينا المشكل، المسألة بسيطة ، نخلي راسي في المستوى العادي ديالو (ما نهزو ما نهبطو) ونحاول نسد نيفي بجوج صبعان ونبدا نتنفس من الفم لمدة 2 دقايق، وأحسن حاجة هو أنني نحط على نيفي شوية ديال الثلج أو شي زيف يكون فيه الما بارد لمدة 5 دقايق حتى يحبس النزيف.

في حالة إلى مبغاش الدم يحبس أو أنه كي جيك الرعاف كل مرة، فهاد الحالة من الضروري تشوف الطبيب ليمكن ليه أنه إما يعطيك الدوا لكتستعملو لمدة أسبوع، وفي حالة إلى بقا المشكل، فهاد الحالة خاصك دير واحد الحصص ديال الكي باش يسدو هدوك العريقات لي طرطقو ولي كتكون بطبيعة الحال عند الطبيب المختصص في الأذن، الأنف والحنجرة .